Quero despedirme de todos vós, comunidade do Xograr, agradecervos todo o apoio recibido, todas as emocións compartidas en tempos difíciles para alumnos, profesorado, persoal non docente. Grazas á colaboración puidestes chegar a fin de curso de maneira máis que satisfactoria. Parabéns! Desde a distancia seguín a vosas actividades marabillándome do voso bo facer.
Comparto convosco algúns refráns de xuño: A auga de San Xoán tolle o viño e non dá pan, Deica San Pedro o viño ten medo, As tormentas por San Xoán tollen o viño e levan o pan (Así o fixeron este ano destrozando os viñedos na ribeira de Chantada), Ao estar xuño xa na beira, busca a fouce e limpa a eira (Cómpre ir preparando a eira para logo colocar as medas cando se segue e carrexe o pan), No mes de San Xoán secan a fontes e arden os montes, De San Xoán prás Navidás os días van pra atrás, Polo San Xoán a sardiña molla o pan..
Como amante da literatura póñovos un enlace ás interesantes reflexións de Fran Alonso no artigo Ler, ecribir, en Nós, diario.
E despídome afectuosamente mentres ollo como pasa o río da vida.
Ata sempre
Vou inserir un interesante vídeo sobre libros que aparece na web de El País.
