Abril, augas mil , e que non saian do seu carril. Traballo para 4º e tarefas de recuperación.

Neste curso académico, o alumnado de 2º de BAC. fixo traballos sobre refráns, consistente na recollida, ilustración e explicación do significado dos mesmos. Estes traballos estiveron colgados no corredor e expostos; tamén fixeron vídeos con eles..

Agora sería a quenda dos de 4º para facer algo semellante, pero deberiades procurar non repetir os xa recollidos. Por ex., hai moitos sobre partes do corpo (dar de man, ter man para algo...se lles dás unha man collen un brazo); sobre experiencias humanas (vivir á miñoca, verlle as orellas ao lobo ou verlle o rabo ao gato...) sobre maneiras de ser, etc ... Para non repetir os xa recollidos, debedes mirar no blog a entrada sobre refráns.

Cada alumno preguntará no seu entorno e recollerá un refrán e ilustrarao cunha imaxe. Debe estar debuxado a man e nunha cartolina tamaño folio. Tamén ten que ter por detrás a explicación do sentido do refrán.Antes de pasalo á cartolina, enviádesme nesta semana o que escollestes e a explicación, para comprobar que estea ben. Logo xa vos digo se podedes pasalo.

Como actividades de repaso para a semana poño:

1. Clasificar as palabras do texto, é dicir, analizalas morfoloxicamente.

No mesmo documento, a portadora deberá declarar que leva desprazándose aos predios en cuestión durante un período mínimo dun ano. Ao tempo, mantense a norma que impide a máis de dúas persoas traballar na mesma finca. Esas dúas produtoras deberán respectar as distancias de seguridade en todo momento, segundo especifica Medio Rural.

2. Buscar os adverbios nas oracións, clasificalos e dicir un sinónimo.

- Se vas ao supermercado anda devagar. Non é preciso que vaias ás présas.
- Somos quen de fecer dúas cousas asemade.
- Agora non podemos ir a clase.
- Antano vivíase peor.
- Vives preto da escola. 
-Fixo os traballos ao xeito.

3. Busca as locucións preposicionais e substitúeas por preposicións.

- Deixou o libro encol da mesa.
- Non chegou a tempo por mor de axudar a nai.
- Manifestáronse a prol da igualdade da mulller.
- A casa está cabo do río.
- Ía a carón dela todas as tardes.

4. Busca as conxuncións nas oracións. De que clase son? Dá un sinónimo.

- Antón e mais María son sarriaos.
- Non son medoso, pero isto dáme medo.
- Non o fixen porque non quixen.
- É tan alta coma seu irmán.
- Chovía moito, así que non saín.
- Ainda que o quixese, non o diría
- Se vés connosco, pasarémolo ben.

Mirade na entrada anterior. Puxen algunha aclaración sobre o texto de Luz Pozo.